Lagaskilmálar Visa

©1996-2023 Visa. Allur réttur er áskilinn.

Visa er heimilt að breyta þessum reglum hvenær sem er með því að uppfæra síðuna. Notendur þessa vefseturs („vefurinn“) eru bundnir slíkum breytingum og eru því hvattir til að skoða þessa síðu öðru hverju til að kynna sér reglurnar.

Visa International Service Association heldur úti vefnum www.Visa.com og tengdum vefsíðum þér til upplýsingar, afþreyingar og ánægju. Þér er velkomið að skoða vef Visa, hlaða niður efni af honum og nota hann með öðrum hætti. Hafðu þó hugfast að aðgangur þinn að vefnum lýtur eftirfarandi reglum og gildandi lögum. Með því að fara inn á og nota vef Visa samþykkir þú reglurnar án takmörkunar eða fyrirvara og viðurkennir að þær gangi framar öllum öðrum samningum eða samkomulagi sem þú kannt að hafa gert við Visa, að því leyti sem ákvæði stangast á. Samþykkir þú ekki þessar reglur skalt þú vinsamlegast ekki skoða eða nota vef Visa.

Vinsamlegast athugið einnig að um vef Visa U.S.A. gildir sérstök persónuverndarstefna. Þegar þú ferð inn á vefi fyrir önnur lönd eða svæði, eða aðra vefi sem eru í eigu eða reknir af Visa U.S.A., skalt þú lesa persónuverndarstefnu hvers vefs fyrir sig, vegna þess að skilmálar geta verið mismunandi.

Aðgangur að og notkun á vef Visa lýtur öllum gildandi alþjóða-, alríkis-, ríkis- og landslögum og -reglum. Nema annað sé tekið fram er þér heimilt að hlaða niður efni sem birt er á vef Visa, þó aðeins til eigin persónulegrar notkunar og ekki í neinum viðskiptalegum tilgangi. Þér er óheimilt að dreifa, breyta, afrita, gefa út, senda, sýna, selja, veita leyfi fyrir, nota, endurnota eða búa til afleidd verk úr nokkru efni sem birt er á vef Visa, í nokkrum viðskiptalegum tilgangi eða í almannaþágu án skriflegrar heimildar Visa eða þriðja aðila eftir því sem Visa telur nauðsynlegt. Þér ber að tryggja að öllu efni sem hefur verið hlaðið niður og/eða afritað af vef Visa fylgi allar tilheyrandi tilkynningar um höfundarrétt eða annan eignarrétt. Öll afrit efnis af vef Visa sem þú tekur og dreifir, í hvaða tilgangi sem er, verða einnig að innihalda þessar reglur. Þér er óheimilt að fara inn á eða nota vef Visa á nokkurn hátt sem gæti, eða sem er ætlað að valda skaða á eða skerða virkni vefs Visa eða undirliggjandi netþjóns eða netkerfis hans, eða trufla notkun annarra á vefnum.

Gera skal ráð fyrir því að allt efni á vef Visa sé varið höfundarrétti, nema annað komi fram, og að óheimilt sé að nota það nema eftir því sem reglurnar kveða á um, eða með skriflegu leyfi Visa eða þriðja aðila eftir því sem Visa telur nauðsynlegt. Eitt eða fleiri einkaleyfi gilda um vef þennan og þá þjónustu og annað sem er aðgengilegt gegnum hann, þ.m.t., án þess að tæmandi sé talið: Bandarískt einkaleyfi nr. 6.091.956 og öll samsvarandi leyfi í öðrum löndum. Visa hvorki ábyrgist né lýsir því yfir að notkun þín á efni sem birt er á vef þessum feli ekki í sér brot á réttindum þriðju aðila. Allar vörur, þjónusta, forrit eða tækni sem lýst er á vef Visa kunna að lúta öðrum hugverkarétti (þ.m.t., án þess að tæmandi sé talið, höfundar-, vörumerkja- og einkaleyfisrétti) í eigu Visa. Visa áskilur sér allan slíkan rétt sem það afsalar sér ekki sérstaklega í þessum skilmálum.

Myndir af fólki og/eða stöðum sem eru birtar á vef Visa eru annað hvort eign Visa eða notaðar með leyfi Visa. Þér og öðrum þriðju aðilum er óheimilt að nota þessar myndir nema slík notkun sé sérstaklega heimiluð í reglunum eða annars staðar á vef Visa. Óheimil notkun á þessum myndum getur falið í sér brot á höfundarréttarlögum, vörumerkjalögum, lögum um persónuvernd og birtingu upplýsinga og öðrum lögum og reglum.

Allar vörur, þjónusta, forrit eða tækni sem lýst er í skjölum sem Visa birtir á vef Visa kunna að lúta öðrum hugverkarétti Visa. Visa áskilur sér allan slíkan rétt sem það afsalar sér ekki sérstaklega í þessum skilmálum.

Vörumerki og vöruheiti sem ekki eru eignuð Visa eru eign viðkomandi eigenda.

Vörumerki, orð- og kennimyndmerki og þjónustumerki, hvort sem þau eru skráð eða óskráð, (einu nafni nefnd „vörumerki“) sem birt eru á vef Visa eru vörumerki Visa og annarra aðila. „Three Bands Design“ og „It's Everywhere You Want To“ eru skráð vörumerki Visa í Bandaríkjunum og öðrum löndum (vörumerkjatákn á vef Visa tákna skráningu á alríkisvísu í Bandaríkjunum). Ekkert á vef Visa ber að túlka sem svo að það veiti, hvort heldur er beint, óbeint eða með öðrum hætti, leyfi eða rétt til að nota nokkurt vörumerki sem er birt á vef Visa án skriflegrar heimildar Visa eða þriðja aðila sem kann að eiga vörumerkið. Misnotkun á vörumerkjum eða öðru efni sem er birt á vef Visa er með öllu óheimil. Visa ver hugverkarétt sinn með öllum tiltækum ráðum, þ.m.t. höfðun einkamála og sakamála.

Að undanskildum persónuupplýsingum þínum (sem fjallað er um í persónuverndarstefnunni) verður ekki farið með samskipti eða efni sem þú sendir á vef Visa, hvort sem er með rafrænum eða öðrum hætti, þ.m.t., án þess að tæmandi sé talið, gögn, spurningar, athugasemdir, ábendingar eða afhendingar, sem trúnaðargögn eða eignarréttarvarin gögn nema persónuverndarstefnunni segi til um annað. Vinsamlegast athugið að um vef Visa U.S.A. gildir sérstök persónuverndarstefna, sem kann að kveða á um aðra skilmála.

Allt sem þú sendir á vef Visa er Visa heimilt að nota með hvaða hætti sem er, þ.m.t., án þess að tæmandi sé talið, að fjölfalda, senda, birta, gefa út, útvarpa og deila með öðrum. Með því að senda efni á Visa.com framselur þú Visa með óafturkræfum hætti höfundarrétt, sæmdarrétt og annan rétt sem þú kannt að eiga í tengslum við efnið. Visa er frjálst að nota, þó án nokkurrar skuldbindingar, hvers kyns hugmyndir, hugtök, aðferðir eða þekkingu, sem er að finna í boðskiptum eða orðsendingum sem þú sendir á vef Visa, í hvaða tilgangi sem er, þ.m.t., án þess að tæmandi sé talið, til að þróa, framleiða og markaðssetja vörur og þjónustu.

Með því að nota vef Visa kann að vera að þú afhendir, eða Visa safni, ákveðnum takmörkuðum upplýsingum um þig og notkun þína á vef Visa. Með fyrirvara um skilmála persónuverndarstefnunni er Visa heimilt að nota slíkar upplýsingar í hvaða tilgangi sem Visa telur við hæfi.

Upplýsingar og þjónusta sem eru veitt eða vísað er til á vef Visa eru veitt á grundvelli þess ástands sem þau eru í, með öllum göllum, og notandinn ber alla áhættu að því er varðar fullnægjandi gæði, virkni, nákvæmni og viðleitni. Þetta felur í sér að þótt Visa geri viðeigandi ráðstafanir til að tryggja að upplýsingar á vef Visa séu réttar og uppfærðar, ábyrgist Visa hvorki né lýsir yfir sanngildi þeirra. Visa ábyrgist ekki, hvorki með beinum né óbeinum hætti, sanngildi upplýsinga né söluhæfi þjónustu sem veitt eru gegnum vef Visa, að slíkar upplýsingar eða þjónusta fullnægi tilgangi eða þörfum þínum, eða að slíkar upplýsingar eða þjónusta feli ekki í sér brot á réttindum þriðju aðila. Visa mun öðru hverju, og án fyrirvara, bæta við, breyta eða betrumbæta upplýsingar, vörur, þjónustu, forrit eða tækni sem lýst er á vef Visa. Visa tekur ekki ábyrgð á villum eða yfirsjónum í efni sem er að finna á vef Visa.

Notkun þín á vef Visa er á þína ábyrgð. Að því marki sem lög heimila ber hvorki Visa né nokkur annar aðili sem kemur að gerð vefs Visa ábyrgð á nokkru beinu, óbeinu, sérstöku eða afleiddu tjóni, eða ábyrgð vegna refsikenndra bóta, (þ.m.t., án þess að tæmandi sé talið, vegna tapaðs hagnaðar, kostnaðar af því að útvega aðra þjónustu í staðinn eða vegna glataðra tækifæra), af hvaða ástæðu sem er, sem rekja má til aðgangs þíns, notkunar þinnar eða þess að þú reiðir þig á vef Visa, jafnvel þótt Visa hafi verið gert viðvart um möguleikann á slíku tjóni. Án þess að takmarka ofangreint tekur Visa enga ábyrgð á, og verður ekki gert ábyrgt fyrir, tjóni sem tengist eða á sér stað vegna vírusa sem hafa áhrif á tölvubúnað þinn eða aðrar eignir vegna aðgangs þíns að, notkunar á eða niðurhals af vef Visa. Visa getur ekki ábyrgst, og ábyrgist ekki, samfelldan, óslitinn eða öruggan aðgang að vef Visa.

Visa hefur ekki kannað allar þær vefsíður sem eru tengdar vef Visa, og það að slíkir tenglar séu til staðar felur ekki í sér samþykki eða stuðning Visa við efni sem er að finna á slíkum tengdum síðum. Visa ber ekki ábyrgð á innihaldi neinnar vefsíðu sem er tengd vef Visa. Tenging þín við, og notkun þín á, slíkum tengdum síðum er alfarið á þína eigin ábyrgð.

Flestar þær upplýsingar sem er að finna á vef Visa gilda á alþjóðavísu, en töluvert magn af upplýsingum gildir þó aðeins um tiltekin lönd eða landsvæði. Ef þú sérð t.d. eftirfarandi ábendingu um upplýsingar á vef Visa,

"Upplýsingarnar á þessari síðu gilda eingöngu um fyrirtæki í Bandaríkjunum."

þá gilda upplýsingarnar á þeirri síðu eingöngu um fyrirtæki með starfsemi í Bandaríkjunum. Þótt Visa geri eðlilegar ráðstafanir til að tilgreina með slíkum yfirlýsingum hvaða upplýsingar eiga sérstaklega við um tiltekin lönd og/eða landsvæði, ábyrgist það hvorki né lýsir því yfir að upplýsingar án slíkra yfirlýsinga gildi á alþjóðavísu. Þú ættir því að kanna hvort upplýsingar sem er að finna á vef Visa eiga við um þig eða félag þitt/stofnun þína. Það að þú hafir aðgang að slíkum upplýsingum sem gilda aðeins um Bandaríkin merkir ekki að þær gildi, eða muni nokkurn tíma gilda, um land eða landsvæði utan Bandaríkjanna.